I bi d Mem Machula [Mem Matschula], die meischtä säge mir Chula [Tschula]. Ä sunnigi u zfridni Bärnerä mitemnä höche ästetischä Wärt. I liebe Mönschä, Fotos u schöni Sache. Näbem Fotografiere hani es Flair für Pflanzä u Innäirichtig.
Düre Tag, wenni nid gad hobbymässig fötelä, schaffi im Sales Beriich vomne Abieter für Internet-Dienstleistigä u Netzwärklösige.
Ir Freizit sy Familie, Fründe, mis Outo, Music, gueti Begägnige, tolli Gspräch u mängisch o wiudi Fescht das, wo mi glücklech mache u erfüue.
Zum Fotografiere bini dürne guete Fründ cho, wo irgendwenn mau gmeint het, dass mini Fotos eifach sou guet syge u so het z eintä när zum angere gfüehrt.
I gloube, dass zum Fotografiere sehr viu meh aus tüürs Equipment ghört. I wett, dass sich ä Mönsch i mire Gägewart wou, verstange u schön füuht. Mis Ziu sy es entspannts Ambiente, cooli Gspräch, freii Kreativität u ä gueti Zyt . Mit dr richtige Kommunikation umne guete Gspüri füre Mönsch, cha das nur wahnsinnigi Shots gäh. 🙂
Fotograf: Stefan Lehmann
Wie isch dr Domain-/Markänamä machuleyes entstangä?
Machula isch zu mim Spitzname worde wäge minä viusitige Frisure u teuwiis spezieue u buntä Outfits. Und mi Leitsatz bim Fötele, isch «So gsehn’i z Läbä, so gsehn’i di – i zeige dir, wie schön du bisch». Und machuleyes isch nüt angers aus ä Zämmeschnitt vo Machula’s Eyes, was widerum söu heisse: Mit dä Ougä vor Machula (dr Mönsch/d Wäut gseh).
Wie isch dr Markänamä chula_clip entstange?
Chula isch d Abchürzig vo Machula, die meisschtä säge mir Chula. Und z Agebot fürd Contentcreatorinne söu nid nur es angers Ziupublikum aspräche, sondern ou angers sy u somit angers heisse. Es geit bi denä Shootings meh drum die Vorstellig umzsetzä, wo d Chundin im Chopf het – es geit meh drum eifach abzdrücke :). Z «clip» het ä Doppubedütig u steit für «Clip» wie «Videoclip» und für «Klick». U so isch dr Brandname chula_clip entstange.
